वीरगंज । नेपाली नागरिकलाई क्यासिनोमा प्रवेश गराई खेल खेलाएको गुनासो बढ्न थालेपछि पर्यटन विभागले पर्सासहित विभिन्न जिल्लाका जिल्ला प्रशासन कार्यालयलाई कडा निगरानी गर्न निर्देशन दिएको छ ।
संस्कृति, पर्यटन तथा नागरिक उड्डयन मन्त्रालय अन्तर्गतको पर्यटन विभागले बुधबार परिपत्र जारी गर्दै क्यासिनोहरूको सूक्ष्म निगरानी तथा स्थलगत अनुगमन गर्न आग्रह गरेको हो । विभागले प्रचलित कानुनविपरीत नेपाली नागरिकलाई क्यासिनोमा प्रवेश गराउन नदिन विशेष सतर्कता अपनाउन निर्देशन दिएको जनाएको छ ।
गत शनिबार राति वीरगंजका विभिन्न क्यासिनोमा प्रहरीले छापामारी गरी ६ जनालाई नियन्त्रणमा लिएको थियो ।
पछिल्लो समय केही क्यासिनोहरूले नेपाली नागरिकलाई प्रवेश गराई जुवा खेलाउने तथा इजाजतपत्रमा उल्लेख नभएका अवैध खेलसमेत सञ्चालन गरिरहेको गुनासो आएपछि विभागले निगरानी कडा बनाएको हो ।
मंगलबार संघीय संसद्को प्रतिनिधिसभा बैठकमा बारा–४ का प्रतिनिधिसभा सदस्य रहबर अंसारी ले नेपालीहरू निर्वाध रूपमा क्यासिनो प्रवेश गरिरहेको विषय उठाएका थिए। उनले विशेषगरी सिमराका क्यासिनोमा दैनिक नेपाली युवाहरू प्रवेश गरिरहेको बताएका थिए ।
पर्यटन विभागका निर्देशक हिमाल गौतम द्वारा हस्ताक्षरित निर्देशनात्मक पत्र पर्सासहित बारा, झापा, मोरङ, भक्तपुर, काठमाडौं, कास्की, रुपन्देही, कपिलवस्तु, बाँके, कैलाली र कञ्चनपुरका जिल्ला प्रशासन कार्यालयमा पठाइएको छ ।
पर्यटन ऐन, २०३५ तथा क्यासिनो नियमावली, २०८२ अनुसार नेपाली नागरिकलाई क्यासिनोमा प्रवेश गरी खेल खेल्न पूर्ण रूपमा निषेध गरिएको छ। साथै, क्यासिनो सञ्चालकले सम्पत्ति शुद्धीकरण निवारण ऐन, २०६४ तथा नियमावली, २०८१ लगायतका कानुनको पूर्ण पालना गर्नुपर्ने व्यवस्था रहेको विभागले उल्लेख गरेको छ।
विभागले जिल्ला प्रशासन कार्यालयहरूलाई कानुनविपरीत नेपालीको अवैध प्रवेश वा अन्य गतिविधि भेटिएमा तत्काल कानुनी कारबाही गरी विभागलाई जानकारी गराउन समेत निर्देशन दिएको छ ।