वीरगंज, २ जेठ –
वीरगंज महानगरपालिकाले सञ्चालन गरिरहेको “क्षयरोगमुक्त वीरगंज अभियान” अन्तर्गत वडा नम्बर २५ स्थित सिर्सिया स्वास्थ्य चौकीमा क्षयरोग खोजी तथा परीक्षण शिविर सम्पन्न भएको छ ।
शिविरमा एआई प्रविधियुक्त एक्सरेमार्फत करिब २ सय जनाको स्वास्थ्य परीक्षण गरिएको थियो । परीक्षणका क्रममा ५० जना सम्भावित क्षयरोगी देखिएपछि थप पुष्टि गर्न उनीहरूको खकार परीक्षणका लागि पठाइएको महानगरपालिकाले जनाएको छ ।
महानगरपालिकाका स्वास्थ्य शाखा प्रमुख राजु साहका अनुसार समुदायस्तरमै पुगेर क्षयरोगको पहिचान, परीक्षण र उपचारलाई प्रभावकारी बनाउन अभियान सञ्चालन गरिएको हो ।
प्रारम्भिक चरणमै रोग पहिचान गरी उपचार प्रक्रिया अघि बढाउँदा क्षयरोग नियन्त्रणमा महत्वपूर्ण सहयोग पुग्ने विश्वास गरिएको छ ।